【一線之差】自毀USB線 自動剷除notebook私隱

有留意私隱外洩嘅新聞，應該都發現唔少個案都係人為疏忽引起，例如唔加密就將啲機密檔案放上網、遺失 USB 手指，甚至成部手提電腦俾人偷咗。視乎外洩嘅資料內容，後果可以好嚴重，企業更有可能因為咁而破產。雖然失竊事件都唔怪得晒當事人，但有無方法可以喺失竊後，阻止到入面嘅機密檔案俾人偷睇呢？呢條 DIY USB 線就可能幫到手嘞。

Linux 嘅系統管理員兼軟件工程師 Michael Altfield，早前突然忽發奇想，希望可以整一條內置自動偵測兼附有毀滅程式嘅 USB 線，只要發現條線同手提電腦失聯，就會自動觸發鎖機或毀滅硬盤內數據嘅程序。結果佢搜尋咗一輪相關資料後，就發現喺幾樣 low-tech 技術配合下，已經可以達成任務。

Michael 將呢條 USB 線稱之為BusKill，製作材料包括一隻 USB 手指、磁力轉接器、USB 延長線，成本價只係 20 美元。不過，材料都只係其次，最核心嘅部分係軟件本身，因為入面儲存住一啲認證資料，例如連接住果部手提電腦嘅生產商、型號同埋佢嘅 UUID，咁先可以對準同一部機，唔怕俾人偷龍轉鳳，快快手將另一部手提電腦連接上去扮無事。

Michael 將呢個小道具嘅製作資料同核心軟件部分放上網後，即刻喺 Reddit 上引嚟廣泛討論。不過，有部分人就覺得未必需要摧毀成個儲存設備，可以只係刪除有加密嘅檔案就夠，因為可以慳返唔少時間。其實 Michael 呢個設計都只係用嚟「拋磚」，相信只要網友提供到有價值嘅建議，就會有人設計出更精密嘅 USB 自毀線嘅。

資料來源：https://bit.ly/2unMpeP、https://bit.ly/2QssjZo

相關文章：【恐怖E學】牙線、手機充電線都會傳染病毒