分享FacebookTwitterWhatsAppEmail 呢幾年勒索軟件（Ransomware）肆虐，聞者色變。以往中招者可能只係揀俾唔俾錢攞解密鑰匙，不過而家就多個選擇喇，除咗以上選項，你仲要揀將唔將啲機密檔案銷毀，否則唔單止解鎖唔到啲檔案，仲會網上見添！ 勒索軟件嘅可怕之處，係黑客會將電腦內嘅檔案加密，由於解密鑰匙係基於高級演算法運算出嚟，所以一旦中招，基本上除咗俾贖金之外，都好難靠自己破解。不過，隨住愈來愈多公司重視備份檔案，受害者開始傾向唔俾贖金，於是黑客又再變招，兩大趨勢分別係會狙擊埋備份嘅檔案，以及喺啟動勒索程序前將啲資料偷走，前者等你無備份可依靠，後者就可以恫嚇將資料公開，等你唔俾贖金唔得。 第二招其實已有唔少勒索軟件黑客組織做緊，好似 Maze、Sodinokibi、DopplePaymer、Clop、Sekhmet、Nephilim、Mespinoza、Netwalker 等等，都特登整咗一個網站出嚟，只要對方唔俾錢就將機密資料上載，包括對方客戶嘅個人資料。不過，黑客組織 Ako 就更加狼死，除咗解鎖費用，仲會視乎對方嘅公司規模或行業，要求俾多筆刪除資料費用，Ako 就曾舉例有公司喺繳交 35 萬美元解鎖費用後，要再俾另一筆刪除資料費，費用由 10 萬元至 200 萬美元不等。 「精明」嘅受害者，當然未必會俾晒兩筆贖金啦！Ako 回應傳媒查詢時，就表示有醫療機構選擇只係俾刪除資料費用。相信呢個受害機構係有做好備份，同時衡量過病人資料外洩，就著個人私隱法例嘅賠償金額應該仲大，所以迫於無奈先俾贖金。 隨住勒索軟件不停進化，應對方法除咗加強員工嘅網絡安全意識培訓、做好備份之外，企業亦要做好數據加密技術，以及將其中一個備份設備離線，咁先可以減低勒索軟件嘅破壞力。 資料來源：https://bit.ly/2ZddNcN 相關文章：【雙面人】WannaRen勒索軟件呢頭鎖果頭解

提到借用大量其他人嘅電腦硬件資源，去達成某個目標，可能大家會即時諗起黑客操控殭屍大軍發動嘅 DDoS攻擊或挖礦（cryptomining）。事實上，借用其他人嘅電腦硬件資源唔一定要作奸犯科，而係可以集合大家嘅力量為人類謀求福祉。好似新型冠狀病毒，現時就有廿幾個計劃需要「眾籌」硬件資源，以早日搵出病毒嘅弱點及研製疫苗嘅方法，不過所謂嘅眾籌唔使實物捐獻，只要讓出部分電腦運算能力就得㗎喇。 Folding@home 眾籌電腦硬件資源計劃，其實早喺 2000 年出現，呢個計劃由史丹福大學 Pande Lab 所主導，目的係借用網民嘅電腦運算能力，去模擬蛋白質嘅折疊過程，以了解多種疾病嘅起因及發展。點解要走去研究蛋白質呢？因為佢係人類細胞構成嘅主要成分，只要出現不正常折疊，就有可能發展成錯誤形狀，同埋會影響埋其他正常嘅蛋白質，逐漸發展成各種疾病，當中好似癌症、腦退化症及病毒，就有需要模擬蛋白質各種折疊狀況，先了解到上述疾病嘅出現原因及治療方法。而喺今次新型冠狀病毒疫情上，由於仲未搵到病毒表面蛋白質同肺部細胞蛋白質嘅結合機制，所以就未研究到有效嘅疫苗。有見及此，Folding@home 喺較早前已開展咗 3 個專門針對新冠病毒嘅研究計劃，而最近更發展至 23 個，希望可以加快研究進度，盡快研製有效疫苗。 想參加呢個計劃？其實唔難，只要你喺連接住互聯網嘅電腦上安裝 Folding@home 專用軟件，系統就會自動將工作送交你嘅電腦演算。擔心會影響你部機嘅效能？其實軟件主要會喺你部電腦閒置時先啟動 CPU 或 GPU…