如果大家好記性，都記得舊年香港爆過單遺失選民登記冊嘅新聞，最精采 係上個月選委會開記招提返呢件事，竟然話調查完都判斷唔到點解會遺失……any肥，我只係想講，香港地方咁細，唔見咗選民登記冊都牽連甚廣，換轉係美國，當然就更大件事，而且分分鐘影響埋選舉結果！ 路透社最近就出咗篇獨家文章，話原來美國政府內部已經做緊嘢，一個月前推出咗新計劃，希望可以喺 2020 年總統大選前，提升選舉系統嘅防禦能力。上屆選舉時，已經有俄羅斯黑客入侵選民驗證系統，從中偷走資料，但大家擔心嘅係上次只係試驗，今次大選行動會升級，黑客唔滿足於拎資料咁簡單，而係透過操控及竄改資料嚟決定選舉結果，咁就更加大件事！ 華府網絡安全和基礎設施安全局（CISA）局長 Christopher Krebs 接受訪問時就話，近幾個月各州縣政府部門先後被勒索軟件攻陷，部分檔案被鎖住唔能夠打開，要用虛擬貨幣交贖金先開得返，而好有可能下年大選都有機會中招，俾黑客用同樣招數鎖住選民資料。 目前 CISA 已經同所有州政府聯繫，一方面提供教材，等佢哋知點樣應對呢類攻擊，另一方面就落手落腳幫佢哋做齊晒各方面嘅測試，睇下有冇乜嘢漏洞，及早作出修補。雖然目前仲未有指引，如果州政府中招後應唔應該俾贖金，但 CISA 就強調做好預防及備份措施，就係希望唔會出現要俾贖金嘅呢一日。 當然啦，唔想俾黑客勒索，最有效方法就係定時備份，有州政府選舉工作人員就話，自從 2016 年開始，已明顯加強咗網絡保安，而且不時都會備份選民資料以防萬一，但係到底要幾耐備份一次先妥當？暫時都未有清晰指引喇！ 資料來源：https://reut.rs/2ZwpYxK

仲記得以前家居寬頻無咁快嘅年代，如果有片有音樂想 Download，而公司嘅網速又比較快嘅話，自自然然會借用公司部腦嚟做嘢啦。所以喺核電廠返工，而身邊又有無限電力，點解唔拎嚟挖礦咁大嘥先！ 無論你有無挖過礦，都應該聽過用嚟挖礦嘅電腦，硬件設備一定要好勁，同時要耗費大量電力。事關挖礦其實係鬥快計數，為咗快人一步計出答案，機能就唔可以慢，又或者學似黑客咁，利用病毒控制網絡上嘅電腦一齊計，咁呢門生意幾乎可以做到零成本。 密室偷電 烏克蘭一個核電廠工人就非常大膽，為咗減低挖礦成本，於是就喺核電廠嘅儲物室內擺放自己嘅電腦，借用電力挖礦。由於廠房內出現不尋常嘅電力消耗，所以驚動咗烏克蘭政府嘅Ukrainian Secret Service（SBU）嚟調查，搜勻成個核電廠後，先至揭穿呢個計劃。起初調查員同核電廠方面好緊張，因為核電廠涉及國家安全，如果俾黑客入侵就會好麻煩，特別係烏克蘭曾因為俄羅斯黑客攻擊而發生大斷電添。好在今次事件只係純粹偷電，犯案員工並無將自己部電腦連接核電廠網絡，所以大家先可以安心收隊。 其實喺核電廠挖礦事件已經唔係第一次發生，上年俄羅斯一個工程師仲狼死，偷用埋核電廠內嘅超級電腦嚟挖礦，連硬件費用都唔出。至於今次烏克蘭核電廠員工由於只係偷電，所以預計刑罰會較輕，而核電廠方面就計劃要追討佢偷咗嘅電費，叫做有人情味喇。 資料來源：https://bit.ly/2zlSwQ0

有網絡安全專家發現，專門中東地區攻擊燃油設施嘅黑客集團，正喺度開 turbo 收集亞太區供電設施嘅 ICS 系統登入身份，似乎準備大開殺戒！ 工業控制系統（Industrial Control System, ICS）掌管住全個國家嘅命脈，好似發電網、供水系統、水壩、運輸網絡、核電廠等設施，都係經過 ICS 管理，所以如果發生國家之間嘅戰爭，ICS 好自然會成為攻擊目標之一，可以造成斷水斷電斷物流，國家就會陷入一片混亂及恐慌。呢啲管理系統咁重要，黑客集團亦唔會放過攻擊機會，不過由於各工業採用嘅 ICS 系統及技術都有分別，投入嘅成本高，所以黑客集團通常只會瞄準一個地區或其中一個行業發動攻擊。不過，網絡安全研究組織 Dragos 嘅專家就發現，呢個潛限制已出現變化，其中一個俄羅斯黑客集團 XENOTIME ，開始由專注攻擊燃油區塊，擴闊至供電設施，出現跨區塊攻擊。 ICS 系統安全性癱瘓…