物聯網（IoT）產品又出事喇，不過今次無特別講明係邊個品牌嘅產品，而係有黑客喺一個知名嘅黑客討論區上，一次過將呢 51.5 萬個 IoT 裝置，包括伺服器、router 及其他 IoT 產品嘅登入名稱、密碼，連同獨立嘅 IP 位址，全部公開益街坊，點解嘅點解嘅？ 今次唔使估估吓，因為黑客本身都講咗佢點搵到呢啲資料同埋公開原因。原來搵呢啲資料並唔困難，佢只係用軟件去掃描成個互聯網上有公開到 Telnet port 位嘅連線產品，之後再用原出廠設定名稱及密碼，同埋弱密碼組合呢兩個方法，嘗試破解呢啲產品，結果就搵到呢 51.5 萬個有齊全資料嘅裝置，可以用嚟發動大規模嘅 DDoS 攻擊嘅 bot list。…

話咁快又到 2019 年尾，又係做回顧嘅好時機喇，唔少 IT 公司陸續發表 2019 年網絡安全回顧，當中又點少得「最強密碼」呢個 item 呢？NordPass 先後根據手頭上獲得嘅個人私隱外洩事故及用家資料庫，歸納出最多人用嘅弱密碼出嚟。雖然數字系嘅「12345」、純愛系嘅「iloveyou」、鍵盤系嘅「QWERTY」、直覺系嘅「password」等依然穩佔榜首，但亦有好多女士嘅英文名上榜，例如Nicole、Jessica 及 Hannah 之類，可見大家用密碼都仲係好隨心，私隱唔係乜嘢大不了嘅事，最緊要係方便記就得。 另一個原因就係好多人都以為強密碼係無可能記得住㗎，就算今次改咗，轉過頭再登入就肯定要㩒「forget password」，咁咪即係盞搞？其實網絡安全專家 Cypri 就話強密碼唔一定要複雜，而係密碼長度勝過一切，所以應該揀 PassPhrase 而唔係 Password，例如 @#E4i8!2 呢組密碼睇落夠晒強，但 8 個字元嘅密碼係今時今日嘅電腦設備下，只需大約 7 分鐘就可以暴力破解；但如果換轉用 「I want to buy 1 pair of running shoes!」呢？呢組望落好弱嘅密碼，一樣有齊英文大細楷、數字同符號，但破解時間即刻暴升到幾百萬年，而且亦唔算難記，所以話強密碼唔一定係複雜就係咁解。 既然強密碼唔需要複雜，咁大家應該都檢查下自己用緊嘅密碼出咗事未。Microsoft 嘅 Regional Director Troy Hunt 就整咗個「Have I Been Pwned」搜尋網頁，搜集咗之前發生嘅洩密事故資料，俾大家檢查下自己個電郵或密碼係咪榜上有名，如果有嘅就不妨根據 PassPhrase 原則去 Set 個新密碼啦！ 資料來源：https://bit.ly/2RVwPRq、https://bit.ly/2PofUVI