由拘捕孟晚舟嗰一刻開始，就知道侵侵政府下定目標，要打擊華為（同埋中國政府）喺電訊設備市場嘅地位，而且侵侵仲不斷拉攏盟友，向華為說不！不過，英國政府正式發新聞稿，表示會「有限度」採用華為設備，侵侵呢個算盤打唔響喇。 呢單消息公布之前幾個禮拜，美國政府已經派出副國家安全顧問 Matt Pottinger 組成嘅代表團出訪倫敦，出力做游說工作。國務卿蓬佩奧、財長努欽亦不停喺國內發表言論，指華為設備對國家安全構成威脅，英國國會亦熱烈討論呢單嘢，結果都係唔能夠令英國跟隨美國步伐，對華為進行制裁。 過去兩年，侵侵極高姿態向「五眼聯盟」盟友（澳洲、新西蘭、加拿大、英國），以及北約盟友（包括德國等歐洲國家）表示，唔應該採用華為設備嚟興建 5G 網絡，以免俾中國政府竊取數據，同時亦不停透過傳媒報導華為勾結北韓、協助打擊疆獨分子、向伊朗出售設備等新聞。而喺英國決定用華為設備後，都仲有三個參議員去信英國政府，話唔想喺英國脫歐之際，重新審視英美自由貿易協定，同埋兩國情報交換機制，希望英國政府三思。 但係睇返今次英國嘅決定，查實考慮得幾周詳：首先所有用嚟傳送數據嘅核心 5G 網絡設備並唔會採用華為，市民有機會用到嘅網絡，華為都只係負責少量機站同埋天線；至於敏感度較高嘅地方例如軍營等等，華為更係唔可以參與，總之英政府就將華為嘅市場佔有率限制喺 35% 以下，確保其他公司如 Nokia、Ericsson 等可以齊齊分一杯羹，算係平衡晒各方面嘅考慮，將潛在風險減至最低。美國嘅輿論就唔係太敢大肆抨擊英政府嘅決定，始終都對兩國緊密關係有所顧忌，同埋希望呢個唔係最終決定，英政府仲有機會改變主意。 唔單止英國，就連德國都陷於兩難情況，無論用唔用華為，就會得失中美其中一方，可能要承受巨大嘅經濟壓力，所以到呢刻都未決定到，而意大利亦傾向學英國「有限度」使用華為設備。歐盟同埋英國國家網絡安全中心亦一齊發出指引，點樣可以同高危廠商（冇指明道姓係華為嘅）一齊興建電訊網絡，仲提供咗可行方法俾其他國家去跟隨；就連美國自己都鬆咗手，國防部阻止咗商貿部禁止當地企業售賣零件俾華為嘅決定，話晒華為每年向美國企業買入110億美元零件，貿然禁賣會令呢批公司減少科研投資，變相令國家失去科技競爭力。 從以上事例可見，用定唔用華為，睇嚟真係唔容易決定，到底美國係唔係真係會制裁採用華為嘅國家？英美兩國關係跟住會點？就要看下回分解！ 資料來源：https://bit.ly/2RSidC0 相關新聞：【侵侵入侵】大量侵侵主題程式蒲頭

無論係企業抑或個人，喺轉售、棄置或因中毒而要重設電子產品嘅時候，都應該要注意小心處理入面儲存嘅資料。以為刪除晒入面嘅資料或回復原廠設定就得？等英國國家網絡安全中心嘅專家話你知得唔得。 英國國家網絡安全中心（UK National Cyber Security Centre, NCSC）早前發佈咗一份關於 電子裝置還原原廠設定或重新配備嘅安全指引，指引內模擬咗四個唔同嘅場景，分別係：裝置受惡意軟件感染、設定新裝置、於組織內將裝置重新交由另一相同職級嘅人使用，及清洗裝置以作出售或於組織內將裝置重新交由較低權限的人使用。根據以上呢四個場景，NCSC 對 Android、iOS 作業系統嘅裝置都有唔同建議。 Android 裝置唔建議放售 首先係清洗病毒及內存資料方面，專家指一旦 Android 受惡意軟件感染，單係回復原廠設定或重裝系統並唔足夠，因為先進嘅惡意軟件可以繼續存在於系統內，同時間，做完以上動作都唔會清除到 SD 卡上嘅資料。如果裝置係牽涉到接觸高度機密資料，專家就建議中毒後要換過部新機，而且由於 Android 裝置係無認證方法可以完全清除所有資料，所以無論部機有無中過毒都好，只要入面嘅資料唔外洩得，都唔好拎去轉售，又或交俾組織內權限較低嘅人使用。…