全球政府抗擊疫情，為咗協助市民留守家居抗疫或遙距工作，唔少服務供應商都免費開放收費服務，例如愛情動作片網站 Pornhub 全球免費任睇，YouTube、Netflix 調低串流影片質素，令歐洲市民嘅上網速度保持穩定，Microsoft、Cisco 亦解鎖旗下 Zoom、Webex 網上會議嘅部分收費功能，盡量協助減少病情蔓延。估唔到，有黑客組織喺呢個時候都衝出嚟搶光環，宣布停止對醫療機構發動網絡攻擊，以及同中咗招嘅「拍檔」共度時艱，減少勒索贖款嘅費用，真係「多謝」晒喎！ 解鎖費用靈活有得傾 關於喺新冠疫情期間嘅部署，暫時有三個主要靠勒索軟件搵食嘅黑客組織企出嚟回應。而所謂勒索軟件，就係透過惡意程式將受害者電腦內檔案加密嘅攻擊手法，而且會透過內部網絡擴散，甚至狙擊埋雲端及內部備份。由於解鎖密鑰喺透過加密演算法計算，所以一般好難破密得到。 DoppelPaymer 黑客集團宣稱從來唔要瞄準醫療機構，以及政府嘅911求助熱線。如果有醫療機構不幸中招，佢哋會提供免費解鎖「服務」。不過，條件係要提供證據審查，避免有大型私院假扮小診所嘅情況出現。至於藥物生產商就唔會幫手，因為佢哋話喺疫情期間藥廠已賺咗好多錢，所以免費解鎖呢？不了！ Netwalker Ransomware 同樣聲稱從來唔會瞄準醫療機構攻擊，不過被問到如果有醫院不幸中招又點呢？黑客集團就無直接回應，只係話如果有人被鎖，就要俾錢解鎖。 Maze Ransomware 呢班黑客集團嘅回應就最出位，佢哋聲稱喺疫情期間唔會再對醫療機構發動攻擊。而基於現時全球經濟危機及疫情爆發，佢哋決定向企業伸出援手，向所有人提供解鎖折扣服務，無論係已中招或新加入嘅「拍檔」，都有得傾！ 資料來源：https://bit.ly/3ajCpDh、https://bit.ly/2QFBdm0 相關文章：【賺外快】國家支援黑客 善用工餘時間偷賭客資料

呢幾年靠社交媒體搵食嘅，或多或少都認同 Facebook 嘅廣告費愈嚟愈貴，等於租間鋪，賺埋賺埋全部交晒租俾 Facebook，好似幫佢打工咁款！最近就有嚟自杜拜嘅黑客集團 OurMine，諗到個別開生面嘅方法，成功透過 Facebook 免費做 promotion，一蚊都唔使俾，到底係乜嘢方法咁鬼正？ 登登登櫈，咪就係入侵 Facebook 嘅 Twitter 同埋 IG 帳戶囉！上星期五（2月7日），OurMine 成功破解咗 Facebook 喺 Twitter 嘅官方帳戶，發…

勒索軟件（Ransomware）係現時其中一種最多罪犯使用嘅網絡攻擊手法，因為佢嘅使用方法簡單，只要幾十蚊就可以喺暗網買到，有黑客集團更以 Ransomware-as-a-Service 形式經營，好似上年開發 GandCrab 嘅黑客集團就高調話兩年間賺咗 3 億美元服務費，好搵過 Bounty Hunter 多多聲。再加上加密貨幣（Cryptocurrency）大大減少罪犯收贖金嘅風險，所以愈嚟愈多勒索軟件出現，而且真係任何人或公司都有可能中招。 搶救失敗無後路 對一般用家嚟講，中咗招大不了重裝電腦，最多係無晒啲相、片同檔案啫；但對於企業嚟講，如果重要檔案或寫緊嘅project、程式被鎖死，而平時又無做好備份工作嘅話，真係有可能執笠㗎！好似美國一間電話推銷公司 The Heritage Company，上年 10 月受到勒索軟件襲擊，因為無做好備份工作，事後又救唔番啲檔案同俾唔起贖金，結果一踏入 2020 年，集團 CEO…

做得黑客，好多時候都係為錢，整咗個勁嘢，當然唔會收埋自己用咁簡單，最好就係公諸同好，放上網公開發售，乘機收返少少開發成本，呢個市場長做長有，質素高功效好嘅病毒程式，仲長期大賣添！ 寫得好，仲會吸引到國家級黑客！最近資安機構 SentinelOne 就出咗份報告，話發現北韓國營黑客集團 Lazarus Group，居然走去買 TrickBot 返去用。 嗱，其實我係無貶意嘅，TrickBot 話晒都係全球三大 botnets 病毒程式之一，實力有返咁上下，只係斷估唔到北韓會吼中佢，事關以佢哋嘅實力，實在唔需要外求，自家研發能力都有返咁上下，點解要買個現成程式返嚟呢？ 報告就話件事唔係咁簡單，一來用 TrickBot 入侵，冇咁易估到係國家級黑客做，最多當係商業行為，容易掩人耳目，二來喺 TrickBot 下面可以加好多組件，今次北韓班黑客就加咗 Anchor，呢個組件出名用嚟搞銷售系統，而今年年初美國財務部就話發現至少有三個北韓黑客組織，入侵銀行系統嚟抬錢返國家，資助國家添置武器，唔排除今次 Lazarus Group 有同樣目的。 其實今次唔係單一事件，今年美國已經發現 GameOver Zeus 同埋 Dridex 呢兩個病毒程式，同俄羅斯國家黑客有連繫，呢個趨勢發展落去，私營同埋國營黑客條界線只會愈嚟愈模糊，日後兩者一齊夾份做世界都唔奇，歐美國家真係有排煩！ 資料來源：https://zd.net/2RWGyXs

睇開我哋嘅報導，應該知道而家喺盜用信用卡資料嚟講，邊個黑客集團最離譜。無錯，就係 Magecart 嘞。呢個慣犯好棘手，佢最叻就係喺網購網站加入一段好短嘅惡意程式碼，靜靜雞偷走用戶去網站買嘢時輸入嘅信用卡資料，英國航空、TicketMaster、Newegg、Forbes 等等好多大企業都中過佢哋招，有網絡專家調查後發現，Magecart 由2010年到而家，已經發展成超過十個小組，每個小組所採用嘅手法都唔一樣，而且愈後期出現嘅團隊，手法就愈複雜，增加偵查難度，真係搞到人人自危。 最近網絡安全專家 RiskIQ 又發表咗份報告，話 Magecart 攻陷嘅網站愈嚟愈多，而家已經超過 200 萬個網站中招，其中好多大企業都採用嘅網購平台 Magento 同埋 Opencart，更加係重災區。RiskIQ 專家話單係用 Magento 網購平台嘅已有 9,688 個網站存有…

成日講某某機構遭受黑客攻擊，其實同大家有乜直接關係呢？舉例如果公共運輸交通系統遭受黑客攻擊，可能要用返現金付款，又或轉搭其他交通工具；櫃員機無錢撳，就要走去銀行排隊攞錢。不過如果係醫院遭受攻擊，原來就唔可以再接收新症，即使病人情況危急，就要跨區去第二間醫院睇急症，隨時會因為咁而失救！ 好似美國阿拉巴馬州（Alabama）三間採用 DCH 醫療系統嘅醫院，現時就因為系統受到黑客嘅勒索軟件攻擊，導致無法啟用系統，為求診病人登錄資料或翻閱病歷，搞到醫院唔再接受新症，除咗急症病人外，所有病人都被轉介去其他醫院治療，其他預約咗檢查服務或手術嘅病人，亦由於醫院睇唔返病歷，有需要為病人安排改期。澳洲方面亦有七間維多利亞州嘅醫院中招，政府發言人話由於受到黑客攻擊，令到系統無法查閱病歷、覆診預約及管理服務，所以同樣要為病人重新排期，部分醫院更加回復到人手預約模式，認真濕滯。 一半機構唔達標 黑客對醫療機構嘅資料愈嚟愈有興趣，其實已經唔係乜嘢秘密。網絡安全評級機構 BitSight，上個月亦發表咗一份關於醫療機構安全性嘅調查報告，結果相當令人失望。BitSight 專家指出只得一半醫療機構達到優異評級，同時亦有 51% 採用緊過期系統或已停止支援嘅裝置，呢啲都係有助黑客發動攻擊嘅利好因素。 除咗勒索軟件攻擊，黑客亦好努力咁去 hack 入系統，因為入面嘅病歷資料非常值錢。除咗可以幫黑客提升社交工程嘅成功率，入面仲可能有名人嘅病歷，例如上年新加坡醫療機構 SingHealth 被黑客盜取嘅 150 萬個病歷中，更包括總理李顯龍，所以先至咁值錢。另外，上月FireEye 專家發表利用隔離系統放置誘餌文件嘅報告，指出黑客對癌症會議文件特別有興趣，相信有關企業係想僱用黑客集團了解美國治癌嘅最新發展，希望可以搶先喺市場上推出新藥物。 資料來源：https://bit.ly/2OusgvK 、 https://bbc.in/2MqN98t

無可否認，企業嘅網絡安全措施做得好，的確可以有效阻截黑客攻擊，不過，黑客亦唔會咁傻仔咁固執，攻你唔入，咪向你嘅第三方供應商落手囉！ 講緊嘅係飛機製造商 Airbus，法新社（AFP）最新報導，兩間有份參與調查嘅網絡安全公司，透露 Airbus 喺最近一年內曾遭受四次大型攻擊，其中兩次係針對佢哋嘅引擎供應商 Rolls-Royce 及 Assystem 嘅子公司 Expleo。法新社引述專家嘅意見，佢哋話雖然 Airbus 有使用 VPN 嚟分隔內部網絡，但佢哋有時亦會允許第三方供應商入嚟做嘢，所以黑客只要能成功攻擊第三方供應商，就可以作為跳板攻入 Airbus。而根據專家嘅調查顯示，黑客進入 Airbus 網絡嘅目的，主要係針對佢哋嘅引擎科技，包括軍用機 A400M 、A350 客機，以及用嚟控制飛機各感應器嘅系統，盜取技術多過想偷個人私隱。…

有追開我哋嘅報導，應該仲記得 Magecart 呢個黑客集團。根據網絡安全專家嘅調查，Magecart 旗下至少有 12 個小團體，功力不一，但佢哋嘅犯案目的就好一致，就係專門盜取信用卡資料。死喺佢哋手上嘅大企業有好多，包括英國航空、TicketMaster、Newegg、Forbes 等等。Magecart 比較令人印象深刻嘅攻擊手法，係佢哋會攻入上述企業嘅第三方服務供應商嘅 web server，喺 Javascript Library 內加入惡意代碼，將幫襯網站嘅客戶引導去另一個像真度極高嘅仿製網站，呃取佢哋嘅信用卡資料。 不過，IBM X-Force IRIS 嘅研究員就發現，近月 Magecart 最活躍嘅第 5…

僵屍網絡係其中一種黑客最常用嘅攻擊方法，因為受感染及操控嘅僵屍電腦真係好使好用，唔單只可以用嚟發動 DDoS 攻擊，亦可以借用嚟挖礦，每部機借少少運算能力出嚟，黑客幾乎乜都唔使做就有加密貨幣收，而且中招者亦唔易發覺，難怪成為黑客愛用手段。不過，最近一個由黑客控制嘅 Command & Control（C&C） Server，就俾法國警方成功搗破，一下子解放咗 85 萬部僵屍電腦，認真功德無量！ 今次事件嘅幕後功臣係防毒軟件公司 Avast 嘅專家，因為佢哋發現咗網上其中一個惡意程式 Retadup 嘅 C&C 伺服器設計上存在漏洞，如果能夠好好利用，就可以將佢由黑變白，遙距移除受害人電腦內嘅惡意程式。 偷襲C&C伺服器 不過，瓦解黑客集團嘅過程都唔簡單，由於 Avast 專家發現…

有網絡安全專家發現，專門中東地區攻擊燃油設施嘅黑客集團，正喺度開 turbo 收集亞太區供電設施嘅 ICS 系統登入身份，似乎準備大開殺戒！ 工業控制系統（Industrial Control System, ICS）掌管住全個國家嘅命脈，好似發電網、供水系統、水壩、運輸網絡、核電廠等設施，都係經過 ICS 管理，所以如果發生國家之間嘅戰爭，ICS 好自然會成為攻擊目標之一，可以造成斷水斷電斷物流，國家就會陷入一片混亂及恐慌。呢啲管理系統咁重要，黑客集團亦唔會放過攻擊機會，不過由於各工業採用嘅 ICS 系統及技術都有分別，投入嘅成本高，所以黑客集團通常只會瞄準一個地區或其中一個行業發動攻擊。不過，網絡安全研究組織 Dragos 嘅專家就發現，呢個潛限制已出現變化，其中一個俄羅斯黑客集團 XENOTIME ，開始由專注攻擊燃油區塊，擴闊至供電設施，出現跨區塊攻擊。 ICS 系統安全性癱瘓…