唔知有無 Android 手機用家發現，最近啲 Data 數據用量好快乾塘，兼夾手機成日好似暖蛋咁熱？有嘅話就要小心喇，可能你部手機已裝咗藏有 DrainerBot 惡意廣告代碼嘅軟件，暗掗地幫你不斷睇廣告，每個月可以消耗 10GB 數據用量及不停為手機放電之餘，仲連品牌投放喺廣告上嘅預算都搾乾埋，好陰毒呀！ 講緊嘅係全球企業軟件供應商 Oracle 早前發現，一款名為 「DrainerBot」嘅惡意廣告代碼，開始喺 Google Play 上嘅應用程式內出現，佢嘅作用，係會自動向廣告供應商要求下載廣告影片，但只會隱形播放，絕對唔會喺應用程式內嘅廣告位上出現，所以大部分受害者好難發現已經中咗招，只會懷疑自己係睇片或玩 Facebook 時洗大咗。 除咗手機用家受害，就連品牌一樣被牽連，因為呢啲已被「機械人」點擊播放嘅廣告，當然需要品牌找數，廣告費用猶如直接倒錢入海。而更無辜嘅係，因為好多開發者只係將下載廣告嘅程式代碼直接放入應用程式內，經過今次事件，連商譽都損失埋，呢鋪真係全世界都輸，唯獨廣告供應商有錢落袋。 根據…