Search Results: 衝動消費 (1)

    廣告商會透過你瀏覽過嘅網頁,或者你搜尋過嘅字眼,去追蹤你嘅喜好或者需要,然後派返相類近嘅網頁廣告畀你睇,呢啲阿茂都知嘅嘢已經唔算得上係新聞,不過成日俾人咁餵法都唔係辦法,一嚟好易造成衝動消費,二嚟你都唔想俾人知道你咁多資料呱。今次就等我地wepro180團隊同你分享六招「防廣告追蹤大法」,嗱嗱臨同我bookmark咗佢。 阻擋第三方cookie存取 簡單嚟講,cookie係一個自動生成嘅檔案,網站伺服器用嚟記錄瀏覽用戶嘅身分、足跡等資料,再傳送返去瀏覽器。當用戶再上同一個網,呢啲記錄咗嘅資料就會顯示返出嚟,方便你去瀏覽,常見嘅包括會員資料、帳戶密碼、購物車清單等等。不過,問題係唔同網站例如購物網、社交媒體以至廣告商係會互相交換呢啲cookie,呢個正正係點解你個排睇開波鞋,轉個頭就喺Facebook見到波鞋廣告嘅原因。所以記得定時去瀏覽器設定度,整理容許或阻止cookie存取嘅網頁清單。 取消Google個人化廣告設定 呢個係針對返用開Google帳戶嘅用家,做法超級簡單,喺手機或者Google Chrome度,打開個人頭像,按入「管理你的帳戶」,將「隱私權與個人化」入面嘅「廣告個人化」設定熄咗佢,你個瀏覽器就唔會再俾其他追蹤系統跟蹤。 瀏覽器要夠隱秘 善用「無痕式視窗」功能,無論睇咩都好(巴打們心照啦),類似嘅功能都可以幫你上網不留痕跡,咁廣告商就自然「無跡可尋」,你又唔駛擔心會俾人見到啲紀錄(尤其係另一半)。 開啟「防止追蹤」功能 好多瀏覽器都提供類似功能,幫你拒絕網頁自動記錄你資料。以Chrome為例,你可以喺「設定」嘅「隱私權和安全性」度,喺『將「不追蹤」要求與瀏覽流量一併送出』選項熄咗佢就搞掂啦。 用信得過嘅瀏覽器 大路未必一定係最穩陣,有啲瀏覽器比較著重保護個人資料,好似Firefox咁,有進階嘅保護功能幫你擋住啲網頁追蹤,又或者係一啲政策比較嚴謹嘅瀏覽器,例如Brave或者Tor;手機方面,可以用Ghostery、DuckDuckGo、Firefox Focus呢幾隻app上網就比較安全。 使用阻截追蹤嘅擴充功能 Chrome擴充功能嚟講,比較出名嘅plugin就有Ghostery 同Privacy Badger,都可以有效幫你阻截網頁追蹤。 以上呢六招相信都夠你防止個人資料俾不明來歷者存取,或者借此嚟賣你廣告,不過網絡安全最緊要都係使用者嘅意識,呢排人人都裝vpn,大家都不妨留意下,一齊對抗危機四伏嘅網絡世界。 資料來源: https://bit.ly/3c05Vy7…