一聽到生物特徵辨識（Biometrics）技術，大家應該好快諗到係乜嘢嚟，而且仲應該成日用到添。事關而家好多智能手機、平板電腦、notebook 都已經支援指紋、人臉辨識，的確方便過入密碼多多聲，所以生物特徵辨識已經唔係乜嘢新鮮事。之不過，Behavioural biometrics 又係乜嘢嚟？應用起上嚟又有乜嘢限制呢？ 所謂 Behavioural biometrics，可以理解為一啲同行為有關嘅個人習慣，例如講嘢嘅節奏、左右手各自嘅打字嘅速度、㩒掣嘅力度、鍵盤使用習慣等等，如果唔係刻意打算去模倣指定目標，都未必會咁細心去留意呢啲個人習慣。可能有人會問，既然有可能模倣，咁點解唔索性用返生物特徵辨識就算呢？ 其實咁諗都無錯，不過，應用喺安全認證方面，個人習慣就比較難模倣啲。首先生物辨識技術一般都擺到明要對比邊啲資料，例如係指紋、虹膜、人臉、聲紋等等，只要知道需要邊種生物辨識數據，黑客都有可能偷同複雜得到。行為習慣生物辨識就難得多，因為應用機構未必會公開到底採集邊種個人習慣，正如上面舉嘅例子，如果唔講明用邊種或邊幾種，就算想模倣都無從入手，倒不如直接威迫當事人簡單。現時呢種技術已有應用程式商店、銀行試用緊，據講成效都唔錯，幫佢哋識別到好多帳戶盜用情況。 雖然 Behavioural biometrics 聽落好似幾安全，不過，實際運用起嚟都有一定限制，因為個人行為習慣好受身體狀況影響，例如原本靠分析左右手各自輸入文字速度嘅方法，喺其中一隻手受傷時會唔會被誤判？又例如客戶中風後，手指嘅靈活程度亦一定受影響，咁樣又係咪會登入唔到帳戶呢？所以 Behavioural biometrics 要普及，相信都仲有好多問題要解決。 資料來源：https://bit.ly/2PBEdQ0 相關文章：【極度恐慌】人臉、指紋特徵要死守 一遇外洩無得翻身

根據華盛頓郵報報導，加州州長 Gavin Newsom 將會簽署法案，限制執法人員喺隨身拍攝鏡頭內加入人臉辨識技術，有份動議呢項法案嘅成員話，原本裝備呢啲鏡頭有助改善警民關係，但如果人臉辨識技術會破壞信任關係，令人憂慮會變成監控工具，咁就寧願唔好有呢項功能住，所以法案會強制禁止執法機關喺 2023 年或之前安裝人臉辨識，真係令人拍爛手掌。其實唔好話有無人臉辨識，要市民信得過呢啲鏡頭，除咗儲存影片嘅方法具透明度，唔可以隨便攞嚟用或銷毁之外，仲要小心存放，否則就好易洩露市民私隱。 好似 Miami 嘅執法機關就唔係好靠得住，早排 Black Alchemy Solutions Group 行政總裁 Jasun Tate 就喺自己個 Twitter 度報料，話網上搵到條公開連結，係人撳入去都可以睇到晒警方隨身鏡頭嘅影片，數量仲有成 1TB…