有請過人嘅都知，面試係好浪費時間嘅事，一傾就成粒鐘，仲多數你唔會只係見一個，搞完一大餐冇咗大半日，可能都搵唔到心水人選，結果第二日又輪迴多一次，成本效益十分低。 有好多科技公司研發咗用人工智能代替真人面試，一來求職者唔使親自嚟公司，打開電腦對住鏡頭就可以遙距面試，而請人嘅亦可以唔使再浪費時間，交晒俾電腦做。香港有冇公司用緊就未知，但係最近路透社報導就話南韓好多公司用緊，據當地經濟研究所統計，131間南韓大企業中有接近四分一話用緊或打算會用AI面試，好似好受歡迎咁。 正因為咁多人用，有唔少南韓生意人就靈機一觸，索性開補習社，教人點樣攻破AI面試系統，呢類雞精班收費唔算貴，三小時課程只係10萬韓元（大約港幣六百幾蚊），因此吸引咗好多啱啱畢業嘅同學仔參加，事關佢哋搵工成功率好低，據統計每四個年輕人只有一個成功搵到工，而南韓補習社文化根深蒂固，十個學生有八個幫襯過補習社，所以用雞精班形式就最適合佢哋。 咁到底面試時會做啲咩？路透社就搵記者試咗一次，首先會叫你介紹自己，人工智能從而分析求職者嘅用字，同埋記錄低開心同埋驚驚嘅反應；然後就會開始問啲比較複雜嘅問題，例如「你公幹時見到上司用公司信用卡買私人嘢，你會點做？」之類，從而測試解難嘅能力；最後就會安排一啲簡單遊戲俾求職者玩，通過遊戲測試出求職者37種能力，從而評估佢有幾適合做呢份工，一啲都唔簡單。 補習社負責人就話，其實無論面試問題同埋玩遊戲，都冇固定答案，所以唔需要特別去記住傳統嘅應對方法，最緊要係控制面部表情，用表情嚟令AI覺得你好有信心，例如唔好咧起咀嚟笑，因為咁樣會令系統覺得你太假，應該改用雙眼嚟笑之類，咁樣系統就會覺得你係發自內心嘅笑，成功加分。另外補習班仲有其他小技巧，搏取面試系統俾高啲分，佢話去年已教超過700個大學生，好多都成功搵到工。相信AI面試都會成為新趨勢，特別係應付一啲大型跨國公司嘅網上面試添。各位IT界朋友，預早學返幾招，話唔定好快用得著㗎！ 資料來源：https://reut.rs/2ROkYms 相關新聞：【新年新開始】Facebook打假 AI人樣帳戶大掃除