俾人搞而唔還拖，原因有好多，例如唔夠打、俾人揸住痛腳、人哋有財有勢……等等。仲有一樣，就係好想賺佢啲錢，所以唯有忍一忍先。 最近澳洲政府嘅舉動，就可能屬於後者。路透社引述消息人士指，當地情報部門已經確認年初多宗黑客入侵事件係中國黑客所為，不過為咗唔好損害兩國貿易關係，所以唔打算公開調查報告內容！ 重溫一下劇情先，話說今年三月，負責網絡情報嘅澳洲國防通訊事務部（ASD）出咗份調查報告，確認喺二月澳洲國會同埋三個主要政黨（自由黨、國家黨及工黨）俾黑客入侵，當時總理 Scott Morrison 話由於五月大選就到，咁敏感嘅時勢唔適宜公開具體細節，表示等大選完咗先再講。 可能總理以為咁就過到骨，點知傳媒衰在記性好。路透社近日就接到報料，話其實份報告寫得好詳細，發現黑客所用嘅程式碼同埋入侵手法，同中國黑客過去嘅手法一模一樣，所以幾肯定佢哋係幕後黑手。路透社之後向總理辦公室同埋中國外交部求證，前者直接拒絕回應，而後者就例牌否認，兼且重申中國都係網絡攻擊嘅受害者！ 消息人士指 ASD 建議調查報告內容要保密，原因只有一個：錢！因為中國係澳洲最大貿易夥伴，係澳洲鐵礦石、煤炭同埋農產品嘅主要買家，佔澳洲出口總額超過三分之一，每年仲有過百萬觀光客同埋留學生前往澳洲，條數都幾襟計，所以將網絡安全同國家收入秤一秤後，就選擇噤聲嘞。 雖然唔知消息真偽，但老實講澳洲近期都有唔少針對中國嘅動作，例如禁止外國政治捐款，同埋禁止電訊設備製造商華為參與當地 5G 網絡建設，已經令兩國關係差咗唔少，如果爆埋呢單就可能真係會影響邦交。之不過，如果真係好似調查報告所講攻擊過三大政黨，相信佢哋都唔會咁易放過總理嘅。 資料來源：https://reut.rs/2lPGQ4H