供應鏈（supply chain）攻擊，可以話係最易令人中招嘅攻擊手法，因為一般人對放喺官網嘅嘢都比較有信心，好少會懷疑提供下載嘅檔案會唔安全，當然如果所謂官網係細公司製作又或做得流流哋，咁又另當別論啦。今次出事嘅係加密貨幣門羅（Monero）幣，有用家話喺檢查由 GetMonero 下載落嚟嘅電子錢包時，發現同官網列出嘅雜湊值（hash）唔一致，懷疑電子錢包俾人做咗手腳。經調查後，發現呢個並唔係錯誤，而係針對 GetMonero 用家嘅惡意攻擊，目的係偷走佢哋嘅門羅幣。 事件發生後，GetMonero 即刻對自己網站上嘅各種版本電子錢包進行分析，發現 Linux 版本俾黑客加入咗幾項特別功能，其中一項係當用家開啟或創建一個電子錢包時，就會自動將用嚟進入錢包嘅 key，傳送去黑客嘅伺服器，黑客就可以用呢條 key 入受害者帳戶轉帳。GetMonero 證實喺 11 月 18 日凌晨兩點半至同日下午四點半期間，下載嘅電子錢包都可能存在問題，建議用家檢查清楚 hash 值，如發現唔同就要即刻刪除。…