【今期流行】2019 首季電郵騙案報告揭盅

    睇得多警訊都知,騙徒手法層出不窮,要避免中招,當然要認清今期流行嘅攻擊手法。網絡安全公司 Kaspersky 剛啱出咗今年第一季度報告,總結電郵騙案嘅手法。結果發現,以下 5 大手法雖然唔算新招,但真係萬試萬靈!

    騙徒手法一:情人節裡出陰招

    第一季度最大節日非情人節莫屬,關於送禮嘅騙案特別多,騙徒扮交友或者花店網站 send 訊息俾你,唔單只會提你買禮物送俾另一半,亦有騙徒會溫馨提示男士買定偉哥為佳節做足準備,誓要引到人點擊訊息入面嘅虛假網站連結,再輸入埋信用卡資料就大功告成!

    騙徒手法二:賣有毒蘋果

    唔係白雪公主入面嘅女巫先識得用毒蘋果,其實每次蘋果有新產品發佈,都係騙徒搵食時機!Kaspersky 發現三月底蘋果出新產品時,每日中招人數由平時幾千個急升至幾萬個,最高峰嗰日甚至接近八萬人,佢哋大部分都係收到電郵通知,點擊連結後去到假蘋果網站,無防備下輸入 Apple ID 驗證,就咁就俾人呃咗個帳戶資料。如已經綁住信用卡,真係可以瘋狂用嚟購買 iTunes 點數卡㗎。

    騙徒手法三:我係嚟幫你整機嘅

    而家電腦出問題,十居其九會上網搵技術支援啦。報告指出近來社交媒體同埋討論區出現大量貼文,聲稱可以幫你一次過搞掂幾樣電腦產品問題,而且騙徒仲寫明會收取合理價錢提升可信性,等你唔會以為免費冇好嘢而唔幫襯。最諷刺嘅係,騙徒連 Kaspersky 網站都複製到一模一樣添。

    騙徒手法四:名人轉載增可信性

    嗱,便宜莫貪,永遠係防止被騙嘅不二法門,但亦都係最難頂嘅誘惑!尤其係騙徒都與時並進,唔止靠電郵搵食,亦開始透過不同渠道搵魚腩。報告上指出騙徒上年已經開始踩入 instagram,唔單只用平價搶 Fo,而且直情當正網店嚟做,用廣告 boost post ,吸引名人轉載,你再估一百萬次都唔會估到佢係造假,結果就有好多人乖乖哋輸入所有個人資料,而件貨就梗係連影都無啦。

    騙徒手法五:我係北京公安,你涉及內地騙案!

    香港嘅電郵騙案來來去去都係速遞公司、北京公安同埋入境處,而去到美國,假扮嘅組織及公司自然要地道。報告表示騙徒會假扮 CIA 職員,指控你捲入一宗發放兒童色情照案件,隨時拉得你,你唔想案件曝光影響個人聲譽,最好乖乖聽話過一萬蚊 bitcoin 到指定戶口……其實同電話騙案大同小異,只係用返當地組織,唔知有無 FedEx 或 DHL 呢啲物流公司呢?

    當然仲有其他手法,例如話有筍工等你做又有,網站帳戶重新認證都有,不過最有新意都係以上五種,記住呢啲玩法,就唔會咁易俾人呃啦!

    資料來源:https://bit.ly/2KafOz6

    相關文章:【守穩個龍門】世界盃最佳網絡防守

    #Kaspersky #Phishing #Spam #情人節 #釣魚電郵 #電郵詐騙

    相關文章