【異動股】Slack 股價真係可以繼續升?

    獨角獸 Slack 經營嘅企業向通訊協作軟件,喺 6 月尾上市後股價曾一度颷升 6 成,而最近雖然跌返啲,但依然高過建議招股價差唔多十蚊美元,可見大家都仲係睇好佢嘅發展,認為佢有力同 Microsoft、Google 競爭。不過,Slack 股價有一個非常大嘅威脅,一日唔處理,企業客戶一日都唔會用得安心,呢個威脅就係傳輸嘅數據無做 end-to-end encryption。

    喺 Slack 嘅招股書入面,都承認咗自己有可能唔足以應付有組織罪犯或國家級黑客嘅複雜攻擊,令到內部系統有可能受到入侵,同時強調理論上唔可能完全阻截呢啲攻擊。咁點解黑客可以攻入系統,就有可能盜取到用家嘅個人私隱,而呢個情況唔會係 WhatsApp、Telegram 上發生?因為 WhatsApp、Telegram 採用咗 end-to-end encryption 技術,當用家發送訊息之時,已經同時做咗加密,然後再喺接收訊息對象嘅裝置上再解密,所以中途即使被攔截,或黑客入侵咗 WhatsApp、Telegram 嘅伺服器,都唔可以還原返呢啲訊息;相反 Slack 就無呢個功能,傳送出去嘅訊息、登入資訊都會儲存喺 Slack 嘅伺服器上,所以只要黑客成功入侵,客戶嘅個人私隱就唔會受到任何保障。

    喺缺乏 end-to-end encryption 加密技術下,Slack 可以點樣去幫助用家保障個人私隱?對於收費用家,Slack 可以容許用家設定訊息保存時間,又或選擇刪除指定訊息嘅權利;不過免費用家就唔好意思嘞,呢啲設定功能你都唔會享用得到,而且雖然軟件只係顯示到 10,000 條訊息,但原來其他訊息依然存在喺伺服器上,所以只要黑客入侵伺服器,但執法機關要求公開訊息記錄,呢啲個人私隱都會俾其他人讀取到。

    Slack 嘅市場推廣策略係推俾企業用家使用,而喺工作層面實在會傳送太多公司機密資料及客戶私隱,如果得唔到保障,其實仲點會有企業願意採用?所以 Slack股價會唔會喺維持現時網絡安全政策下繼續上升?呢個就真係一個謎喇。

    資料來源:https://nyti.ms/2FMun8K

    相關文章:【得罪方丈】微軟禁止員工用Slack

    #endtoendencryption #google #Microsoft #Slack #Telegram #WhatsApp

    相關文章