【自導自演？】慈母禁用Twitter 15歲少女奇招出tweet
而家網上世界真係好多 fake news，你睇 Facebook 都話嚟緊幾年會專注打擊假消息，就知問題有幾嚴重，所以喺轉發新聞前，真係要盡量做下 fact check，就算驗證唔到，都要盡力了解下真相。好似上星期開始喺 Twitter 上蘊釀嘅我要上 Twitter 事件，主人翁好可能連 Twitter 同 LG 都玩埋。
喺 8 月初，有個慈母因為阿女 Dorothy 玩手機玩得太投入，煮嘢食時都掛住玩手機，結果搞到著火，慈母即時沒收晒佢嘅手機，希望佢可以多啲留意現實世界嘅嘢。Dorothy 梗係極之唔開心，因為除咗上網玩 Twitter、分享下佢偶像 Ariana Grande 嘅消息之外，呢個 15 歲嘅少女喺暑假期間都無乜嘢好做。於是佢就嘗試用任天堂手提遊戲機 NDS 嚟發 tweet，同追蹤佢帳戶嘅網友訴苦，但由於慈母都係 follower 之一，所以就沒收埋部 NDS，仲用阿女嘅帳戶發 tweet 話會刪除帳戶。
IoT產品助自由發言
網友當然好擔心，開始留言聲援，但呢個時候 Dorothy 又再出 tweet，話襯阿媽返工又偷偷地用任天堂 Wii U 嚟留言，結果部機當然再度被沒收。以為 Dorothy 無晒辦法？大家又估錯晒，原來佢屋企用緊部 LG 智能雪櫃有上社交平台功能，Dorothy 於是又再發 tweet，內容係話自己而家同緊部雪櫃講嘢，連自己都覺得有無搞錯。件事嚟到呢度都差唔多完喇，因為已開始有人喺留言上話好假，家長無理由會沒收晒所有科技產品，亦有網友留言指控 Dorothy 有好多個身份，上述內容全部都係老作。不過呢，今次事件 Twitter 同埋 LG 都有喺 Dorothy 嘅帳戶上留言，仲落埋 #FreeDorothy 呢個 tag，即時將事件炒熱。如果最後發現禁錮科技產品件事係假，咁就真係俾人跣咗一鑊，只能怪自己跟車太貼喇。
相關文章：【以黑易黑？】日本容許官員 Hack 人民 IoT
