【未出先興奮】Android 10 193漏洞有待解決
Google 上星期公佈，新一代智能手機作業系統 Android 10 即將推出，新 OS 雖然喺保護個人私隱上落咗唔少功夫，但現時表明仍有 193 個漏洞有待解決，對 Android 超級粉絲嚟講，真正嘅考驗嚟喇！
新一代 Android 一改以往用甜品嚟命名嘅作風，今次就咁叫做 Android 10，官方解釋話嚟到第十個版本，加上有 25 億裝置用緊 Android，係時候要改變咁話。喺確認推出日期之餘，Google 同時喺 Android Open Source Project 嘅揭示版上公佈Android 10 嘅開發進度，指出現階段新系統仲有 193 個漏洞需要堵塞。
Android 10 漏洞全屬中級風險
呢 193 個漏洞層面非常廣泛，包括可以俾黑客提升權限、遙距執行代碼、洩露隱私及截斷服務等等，整體嚟講，68 個漏洞嚟自 Android 媒體框架，97 個出自系統本身，其餘就同 Android runtime、Library 及 framework 有關。
面對咁多漏洞，Google 就拍心口咁講推出前一定可以全部修復，因為呢啲漏洞嘅嚴重性只屬於中等，而且直至呢一刻都仲未收到測試版本有任何漏洞被利用，作為 Android 超級粉絲，今次就真係講個「信」字喇。
至於 Android 10 有乜好處？其實之前我哋都介紹過佢喺保護個人私隱方面有重大提升，包括系統會限制應用軟件開發者追蹤用家活動、過度取用手機功能、不可自動開關 Wi-Fi、以沙盒分隔應用軟件執行等等，同時亦會自動下載及安裝重要嘅系統配件，而毋須重新啟動系統。
