【5G前奏】揪出4G路由器漏洞造福未來
研究員剛於 DEF Con 發表報告，指出大量 4G 路由器存在漏洞，黑客可輕鬆遠程突破。其實 5G 都嚟緊，做乜仲集中火力去調查 4G 路由器呢？原因好簡單，研究員話根據過往經驗，好多製造商喺開發新產品時，核心程式碼其實都會同舊產品差唔多，所以如果唔正視問題，呢啲漏洞將會喺 5G 產品上繼續出現，所以唔好以為產品過時就唔使理。
Pen Test Partners 於 DEF Con 發表報告中，指出唔少知名牌子嘅路由器均存有多重漏洞，包括命令注入及遠程代碼執行漏洞，黑客只須編寫含惡意代碼嘅網站，之後就可以靜候有漏洞嘅路由器登入中招。研究員更指出，部分漏洞更容許黑客盜取登入密碼及其他資料，之後就可以盡情截取數據或將連接路由器嘅用戶導向其他虛假網站，非常大鑊。Pen Test Partners 已經向相關路由器製造商，舉報各項漏洞嘅細節，而大部分生產商已經修補問題。
貨尾照賣 漏洞唔理
無錯，係大部分製造商有修補啫，並唔係全部都咁合作喎。Pen Test Partners 話有部分生產商並無回應訴求，其中特別點名指出中國品牌中興（ZTE）尤其惡劣，首先係一款已停產嘅路由器 MF910，研究員舉報咗當中嘅漏洞後，ZTE 並無作出任何反應，反而另一款仲處於生產周期嘅路由器 MF920 就有即時修復。表面上好似好合理，但實情係 ZTE 網站上仲賣緊停咗產嘅 MF910 貨尾，簡直置客戶嘅安全於不顧，研究員亦推斷 ZTE 只係逐款產品修正，而唔係喺幾款產品共用嘅程式碼上著手。另外，研究員亦指出 Netgear、TP-Link 及華為嘅產品都榜上有名，不過問題就無 ZTE 咁嚴重。
喺報告嘅最後，研究員話其實 Netgear 本身都有賞金制度，但如果攞咗賞金就要滅聲，唔可以拎出嚟討論，所以佢哋今次就選擇唔經賞金制度舉報，目的自然係想多啲人知件事啦！
