【澳洲惡法】科技公司拒助警解鎖罰5000萬 個人最高囚5年
涉及侵害個人私隱嘅法例推行，會唔會影響到國外投資者信心，以及侵害到國家喺國際上嘅競爭力問題，最近又成為咗澳洲政府獨立安全法監察局（Independent National Security Legislation Monitor,INSLM）檢討緊嘅問題。負責今次調責嘅 Dr Renwick 就話，雖然現時全球政府都面對住加密技術妨礙搜證嘅問題，但如果呢啲侵入性法例會令到公眾懷疑佢嘅安全性，同時會令執法機關行使不必要嘅權力，咁就有機會要修正喇。
方便搜證疑侵害私隱權
講緊嘅係澳洲上年年尾通過咗一條Telecommunications and Other Legislation (Assistance and Access) Act 嘅修正法例，目的係為咗方便執法人調查罪犯，以防佢哋以加密方式收起犯罪證據，因此建議但凡唔肯向執法人員提供手機同埋手提電腦密碼，有機會被判五年監禁及罰款50000澳幣。
咁都不特止，正所謂魔鬼永遠喺細節度，原來條例仲講明，如果執法機構要求科技公司幫手，解開某人嘅電子設備密碼，而科技公司拒絕配合，分分鐘要面臨約 5000萬港幣嘅罰款！而如果科技公司嘅員工向任何人透露執法機構嘅要求，亦有機會被判五年監！外國公司亦可以用呢條法例，叫澳洲律政部長查你部電腦，睇下有無境外犯法，總之一句講晒，就係條法例好鬼惡啦！
澳洲政府嘅理據係，因為近幾年科技發展太快，影響到執法同埋危害國家安全，所以先打算立呢條法例，新南威爾斯州公民自由委員會副主席Lesley Lynch就認為，一旦通過政府權力明顯過大，喺現今民主社會好難覺得條例係合理同埋必需。
條例通過後，立即惹嚟市民反感，原本工黨答應今年五月大選後會修改法例，但由於最後嘅大贏家係澳洲自由黨—國家黨聯盟（Liberal-National coalition），所以條例亦無再有跟進行動。作出跟進行動嘅反而係澳洲議會情報和安全委員會，佢哋已進行獨立調查，並會將結果轉交INSLM，而INSLM 亦會喺明年三月將結果交回，呢次合作都可以話係澳洲史上首次。
嚇壞投資者
唔單只民間反對，澳洲專門監察數碼權限嘅組織 Digital Rights Watch 甚至建議應應該全盤回收呢條修正法例，因為佢哋認為上年立法時由於時間太急，導至議員根本未了解佢會對澳洲科技業帶嚟嘅毀滅性影響，令到科技公司唔敢喺澳洲投資，本地嘅科技人員亦唔敢創業。
其實呢條條例就連澳洲國防部都承認，某程度上會影響澳洲科技公司嘅競爭力，但只係話會致力解釋清楚條法例。到底今次 INSLM 嘅調查報局，可唔可以將呢條「惡法」回收？就有待明年公布嘅結果喇。
