【遙距偷匙】Keyless Go車主小心失車

    科技愈發達,帶嚟嘅方便就愈多,好似以前揸車要周圍搵車匙先可以撻車,但自從有咗無車匙 Keyless Go 技術,只要車主袋住車匙喺身就得。不過,呢種無線識別嘅技術,亦令到受攻擊嘅層面加大,黑客利用意想唔到嘅方法,將車匙遙距拎到手,根據 The Association of British Insurers 發表嘅統計數字顯示,單係 2018 年經佢哋處理嘅失車數字就多達 56000 架,比起 2017 年上升咗 12%。雖然唔係全部都因為呢種技術而失車,但 ABI 都警告 Keyless Go 有可能提升失車數字。

    到底黑客係點樣做到呢種攻擊?原來佢哋並唔係複製咗車匙嘅訊號及解鎖密匙,而係利用放大器,將車主放喺屋企入面嘅車匙訊號放大,就算距離較遠,都可以用「駁上駁」方式將訊號同解鎖密匙送到去架車附近,成功呃過車身嘅防盜系統,唔算係啲乜嘢高科技嘅技術嚟。

    要防範呢種偷車方法,專家建議車主要好好保管車匙,除咗唔好放近門口或窗邊,仲要最好買一個可以阻截 RFID 訊號嘅袋,無用時就將車匙放入去,避免無線訊號被放大。

    另外,專家亦建議車主買返個軚盤鎖,增加偷車嘅難度,如果條車匙具備熄機功能,無用時亦要熄咗佢。最好就係要喺車入面安裝 GPS 追蹤系統同埋要收得隱閉啲,就算俾人偷咗,都有較高機會搵得返。至於喺香港,相信住喺村屋嘅車主風險會較大,所以最好就買返個 RFID 袋嚟用。

    資料來源:https://bit.ly/2pqEHhu

    #ABI #KeylessGo #RFID #偷車 #軚盤鎖

    相關文章