【騰騰震】抖音漏洞 私人短片公開睇
唔少人都鍾意玩「抖音」（TikTok），特別係後生仔女，時不時都會拍片上傳。不過，早排多個美軍部隊就指出抖音存在嚴重保安漏洞，禁止士兵喺軍用手機上安裝使用。到底有乜咁嚴重呢？謎題終於開估喇。
以色列網絡安全服務供應商Check Point 嘅專家，早兩日就發表研究報告，指出佢哋原來喺上年 11 月，已經就抖音嘅安全漏洞，去信佢哋嘅母公司 ByteDance。專家發現只要通過假扮抖音向用家發送內含惡意連結嘅短訊，一旦用家唔小心開啟，黑客就可以通過漏洞嚟控制用家嘅帳戶，代用家發布及刪除短片、公開用家嘅私人短片，甚至攞到用家登記嘅電郵地址等等。唔單只手機 app 有漏洞，就連抖音嘅網站亦唔安全，其中一個搜尋欄位可以俾黑客插入惡意程式碼，發動 Cross-site Scripting 攻擊，從而去盜取其他用戶嘅登入資料。
Check Point 專家將漏洞報告交咗俾抖音後，抖音嘅網絡安全部門即刻修補，並喺 12 月中推出嘅更新版中，將漏洞全部堵塞。佢哋嘅安全部門主管 Luke Deshotels 事後就多謝 Check Point，話好歡迎安全專家私底下將零時差威脅通知佢哋，等佢哋可以即時作出修補。
其實好似呢類新上位嘅科技公司，有安全漏洞並唔意外。網絡安全服務供應商嘅專家都話，呢啲公司通常會將注意力放喺業務發展上，即係出多啲特別功能吸引用家，網絡安全反而放喺其次。而抖音嘅全球用戶超過 15 億，亦喺 150 個地區推出服務，一旦有漏洞俾黑客利用，受影響嘅人自然非常之多。而作為用家嘅你，如果仲未更新抖音，而家就快啲去更新喇。
相關文章：【睇片即死】WhatsApp再爆入侵漏洞
