【大件事】Bossini、c!ty’super成為勒索軟件攻擊目標？
勒索軟件（Ransomware）的確令人聞風喪膽，小編身邊已有唔少朋友嘅公司中咗招，一日唔提高防禦水平，相信受害者將會普遍到總有一個喺左近。就好似最近一個新開張、專門提及有邊啲公司正受到襲擊嘅 Twitter 帳戶，竟然有大家都識嘅 Bossini、c!ty’super 份，而且仲話黑客要脅只要唔俾贖金，就會公開偷咗嘅資料，唔知你又係唔係佢哋嘅顧客或合作夥伴呢？
呢個新開張嘅 Twitter 帳戶叫做@ransomleaks，由今年 5 月開始營運，專門喺暗網收集資料，睇吓有邊啲黑客組織喺暗網拍賣盜竊返嚟嘅資料，或喺網站公開受害公司部分機密檔案，作為判定有邊間公司已經中招。到底啲料堅唔堅呢？小編就用咗喺 5 月公報嘅一啲個案嚟驗證，發現好似澳洲物流公司 Toll Group 及奧地利 Weiz 小鎮嘅報導都真有其事，所以今次佢話 Bossini 同 c!ty’super 分別中咗 Maze 同NetWalker 呢兩隻 ransomware 招，都唔係完全無可能。
有追開我哋嘅報導都知，宜家勒索軟件嘅攻擊手法已經同以前好唔同，由以前只係鎖起受害者電腦內嘅檔案，慢慢發展到鎖埋相同網絡內嘅電腦。隨住企業開始注重備份，黑客開始感受到愈嚟愈少受害者俾贖款，於是就追埋備份資料嚟加密，以及係加密資料前偷晒企業嘅重要資料，作為勒索贖款嘅一部分，只要唔俾錢，就會攬炒公開呢啲機密資料，或公然拎去暗網拍賣，以打擊受害企業嘅信譽或令到佢哋被執法機關懲罰，所以就算你點做好備份都無用，最重要都係守好前線，提升網絡安全防禦力同為員工進行培訓，先可以減少中招風險。
其實今年一月香港電腦保安事故協調中心發表嘅報告，已經表明針對香港而發動嘅勒索軟件愈嚟愈多，仲話有證據顯示唔同嘅黑客組織開始合作或技術分享，令攻擊變得愈嚟愈精密。其中更曾發現 Emotet-Trickbot-Ryuk 呢三隻惡意軟件結合而成嘅攻擊。想了解成個攻擊過程係點？本地網絡安全顧問公司Dragon Advance Tech嘅創辦人Frankie Li 就曾經喺上年十月發表whitepaper，有興趣可以下載嚟睇。
相關新聞：【McAfee報告出爐】勒索軟件轉新玩法
