【專家主場】形外佳興 ─ 你係真唔係啊？

中文字譯西文，經常令人捧腹。我細細個睇新聞，話檢查有毒物質呈現陽性反應好有問題。我心諗，乜陽性係唔好嘅咩？後來才知係 “Positive” 的翻譯之「誤」。唉，咁樣阿石里克哥哥嘅理論，不如譯做邏輯陽性論，仲勁啦。

上次 Neo 講魚事，旋收讀者來函，又幾好笑。一家人食飯之際，收到阿仔喺大陸的求救 WhatsApp。佢話：「我的銀行存款用完，是否可以存款入我戶口？如果可以，請先轉一千，稍後我再存入你戶口還款。」成家人一睇，文法正確，標點符號完備，語句邏輯通順。所以：必然係假的！而且，眾說紛芸：

• 阿仔係唔會用完存款嘅！
• 大陸點會有 WhatsApp？
• 佢返咗大陸，會唔會跌咗電話，電話中毒？
• 點會要求轉一千咁多？
• 用辭好似騙案！
• 我地唔好回應佢！

結果 Call 咗佢，原來係真！據聞成家人鬧到佢飛起，話佢點解寫 WhatApp 用晒正確文法，完備標點符號，通順語句邏輯，阿仔深感慚愧云云。想想，這也不失為一則人肉 False Positive 新聞。

果 D Security Devices 例如防火牆、入侵警報器等等，總會有不準確情況。不準確有兩種：冇問題當係有問題，有問題當係冇問題。統計學上，前者叫 Type I Error，亦稱 False Positive；後者叫 Type II Error，亦稱 False Negative。統計即係或然，或然即非必然。講起統計，有一次同個 Security Officer 傾偈，佢話，好大劑，個 Simulated Test 攻入咗。我話，咁咪好囉，知道有 Improvement Area 嘛。佢答：Management 問我，買咗成屋武器，點解唔係「必然地」安全、攻唔入？？我也當場語塞，因為，我都唔想個 Security Officer 「或然地」有糧出。False Positive 與 False Negative 其實即係誤報與漏報，但太土氣，我地 D Professionals 出來行，硬係要講一 D 勁嘢，「我地隻 Device 好少出 False Positives！」嘩，請鼓掌！

Neo 按：

孔夫子曰：富貴、貧賤，不以其道得之，不處／去也。
此「之」，也有 Positive 與 Negative 二義乎？