【專家主場】形外佳興 ─ Fing 手機
又是深宵夜機。望下機場跑道，一閃一閃的指示燈，想起白馬過隙之凡世。又望下黑漆漆的夜色，想想，以大小論，我們的地球，比起銀河系，就有如一粒細菌比起地球咁細。以時間來說，悠悠百歲光陰，比之於宇宙歷史，就等於在一生人中洗半個面咁快。天地者，萬物之逆旅；光陰者，百代之過客。地球人者，細菌之洗面乎？
想到自己咁渺小，只好攞部手機出來 Fing 下。Fing 下 Fing 下之際，想想，手機知唔知我喺度 Fing 緊佢？梗知啦，部手機有感應器嘛。跟住又諗，有乜嘢感應器呢？睇下，大概有以下的感應器，正在收集緊我 Fing 手機的情報：
喺邊度 Fing：Magnetometer 知道你的方向，GPS 知道你的位置，還有 Proximity Sensor 知道你有沒有咀部手機；
點 Fing：Gyroscope 知道你點轉部手機，Accelerometer 知道你有冇加速，Pedometer 知道你行唔行得郁；
Fing 成點：Thermometer 知道你好慶，Hygrometer 知道你好濕，Barometer 知道你好大壓力，Ambient Light Sensor 知道你在放光，Microphone 知道你在喊／你身邊有人喊／你身邊部電視節目中有人喊／你問過 Siri 嘅所有問題…；
重有其他情報，例如心跳、紅外綫、手指模，當然，點少得兩個影前影後嘅 Camera，影住我個樣！
咁多 Fing 手機情報，邊個想知？可能係 D Apps 最想知。咁又係，我過去 N 年之內，去過邊，坐過乜車乜船，搵過邊個，做過 D 乜，幾時飲醉，上網睇過乜，身邊遇過乜嘢動物，可能個手機比我更清楚。平時我們大腦，總會將呢 D 唔等駛嘅信息濾晒，咁就大事化小，小事化無。偏偏而家，我褲袋個手機，掌握了我的一點一滴，永留青史，並能預知我想買乜。手機啊手機，我可以 Fing 走你嗎？
（Neo按：後來落機去坐機鐵，望下個牌，寫住：“Every MTR staff member serves passengers with heart”。奇怪，MTR staff 點樣區分 passengers with heart 同 passengers without heart 嘅呢？啊，一定係 Heart Sensor！）
