【SME180】中小企必需掌握的 7 個科技大趨勢
雖然大多數中小企面對新科技總有一份無力感，既無資源又唔熟悉。其實唔使太過擔心，科技絕對唔係洪水猛獸，反而可以幫助中小企業節省成本。以下係 7 個中小企科技大趨勢，管理層一定要睇睇。
1. 善用人工智能減省累贅工作
好多人都將善用 AI 同研發 AI 搞亂，中小企只須謹記，我哋只係要善用 AI。簡單如利用軟件幫你自動追蹤項目進度、提醒隊員開會交功課都可以交俾 AI 處理。再者，現今的 AI Chatbot 已經非常成熟，一般重複又重複嘅客服問題就交俾 AI 罷啦。善用 AI 可以幫助小企業慳返好多時間，集中精力做生意。
2. 搜集及分析數據
常說數據就係「新石油」，係咪大企業先開採到？當然唔係，善用現今科技，中小企都可以建立自己嘅小油井！其實中小企同唔同人做生意，或照顧客戶嘅需求，已經可以收集到好多數據，問題只係唔知道呢啲數據可以點運用。現時已經有好多數據分析服務可以俾中小企用，稍加分析，就可以更精準做市場推廣、定價、了解目標客戶的需要，攞到好多有用嘅啟示。
3. 進一步數碼融合
即使已開始緊數碼轉型，亦唔好俾佢停落嚟，進一步將企業數碼化，可以喺細微處改一改，亦可以有顯著效果，例如用更多 IoT 產品，簡單如運用智能電燈、智能溫度計已可以幫你慳返燈油火蠟錢，作為中小企，數碼化就係實實際際，絕不是紙上談兵。
4. 更多遙距辦公
大量調查顯示遙距辦公將成大趨勢，有報告指出 2020 年將有過半數員工會遙距工作。管理層可考慮建立遙距辦公系統，包括穩妥可靠嘅通訊平台、協作平台、雲端數據庫等。中小企既可節省大量硬件成本如辦公室、辦公室設備等，又可以更靈活執行各項工作，擴充業務更有彈性。
5. 投入資源強化 API
基於用戶及公司內部越來越依重各種應用程式，企業必須更關注 API 嘅優化，自家應用程式固然係重點，同時亦絕唔能夠忽視與各大平台嘅協作，例如深化社交平台嘅聯繫，善用 Facebook、IG、Wechat 等平台數據。另外，可引入更多管理工具如 Trello、Basecamp 以及支付工具如 PayPal 等。
6. 重視網絡安全
員工嘅網絡安全意識培訓非常重要，因為一旦出現資安事故，後果可以非常嚴重。事實上，黑客絕對唔會只針對大企業攻擊，反而中小企先係目標。坊間已有不少可靠又便宜嘅保安方案，企業管理層應積極使用。此外，亦要制定一套事故應變策略，當發生保安事故，就能夠第一時間作出反應。
7. 顧用 IT 管理服務
而家 IT 人手短缺，有錢都未必請到人，更何況無錢？與其花錢聘請 IT 人員，不如轉用服務式 IT 啦。如果你需要 24/7 網絡監察、威脅情報及回應服務的話，顧用 IT 管理服務幾乎係唯一選擇。現時不少電訊公司已推出不同規模嘅管理方案，絕對可以減輕中小企嘅 IT 管理壓力。
越早用越有用
其實中小企應付數碼轉型，不外乎要考慮資源及知識兩大問題，其實現時各種適合中小企數碼轉型嘅技術已經發展成熟，而且不少服務及應用程式都非常簡單易用，絕對可以用有限資源開拓無限商機，越早學習實踐，就越早收成，各位務必立即行動呀！
