【攬炒】 華爾街市場 人人自危 歐美聯手搗破第二大暗網
講緊嘅唔係侵侵嗌停中美貿易談判引爆嘅華爾街股災，而係全球第二大暗網交易平台 華爾街市場（Wall Street Market）因為被歐美警方聯手搗破，搞到賣家及用戶人人自危嘅事件。今次行動能夠成功破獲呢個暗網（Dark Web）交易平台，原來全因一個管理員勒索用戶失敗，於是決定攬炒，將登入 華爾街市場 嘅資料公開，造就今次歐美警方嘅聯合行動大舉成功。
暗網保護基制隱藏身份
暗網交易平台，係指透過洋葱網絡（Tor）嘅層層隱身管道，成功製造出一個俾毒品、武器等違禁品賣家及買家聚集嘅網上空間，由於身份難以追蹤，所以全球警方要對付呢啲平台都唔容易，要喺上面販毒、售賣軍火、買兇都得，而平台就會收返啲服務費。當然為咗隱藏身份，就連交易都會用加密貨幣。
Silkkitie 被冚 華爾街市場 人流大增
今次歐美警方聯手搗破 華爾街市場 嘅行動雖然發生喺 4 月尾，不過，事件嘅導火線可以追溯至今年初芬蘭海關瓦解另一個暗網交易平台 Silkkitie 開始。由於芬蘭海關成功拉人封鋪，逼使原本喺 Silkkitie 平台販賣毒品嘅罪犯轉移去其他平台做生意，其中當然包括 華爾街市場，令到網站嘅用戶數量急升，平台流量不勝負荷，好快就出通告通知用戶暫停營業。不過，由於之前曾經多次發生暗網交易平台創辦人以維修為名、實際係驚住引起警方注目而進行緊挾帶私逃嘅準備，所以 華爾街市場 嘅賣家及用戶即時反彈，喺留言區指控創辦人準備緊撤走。而喺呢段時間裡面，平台其中一個管理員Med3l1n 可能意識到就快會俾人拉，所以竟然向賣家及用戶發出勒索電郵，要求每人支付 0.05 比特幣，否則就以無加密方式將所有人嘅資料放上網。
之不過，用得暗網嘅人又點會係善男信女？當然唔係好多人俾錢，結果 Med3l1n 決定攬炒，將自己嘅登入資料以及 華爾街市場 嘅伺服器位址公開，令歐洲國際刑警可以追到來源，唔單只封咗伺服器，更成功捉到三個年齡介乎 22 至 31 歲嘅德國人主腦，起出 55 萬歐羅、六位數字加密貨幣、幾架名貴跑車等贓物，當然唔少得拉埋 Med3l1n 啦。另外，華爾街市場 兩個最大嘅毒販亦喺美國落網，相信警方攞住交易平台上嘅記錄，之後仲會有更多人被捕。所以話，喺暗網交易並唔係 100% 安全，何況交易紀錄喺晒創辦人手上，好大可能會俾佢勒索返轉頭，真係好大風險㗎。
