【Mr. Smith週記】做人上司 唔好太 on cloud

    人生有個豬隊友確係慘仔嘅,最慘如果係自己上司,有時都唔知點幫佢兜,搞到我都好想升高三個 key 同佢講,「你真係蠢唔係扮㗎喎!」唔知係咪開口中,早幾日 Mr. Smith 就遇到以上情況喇。

    事緣上星期要測試 vendor 產品,分析吓有冇後門,其中一項要做 dynamic analysis,睇吓隻軟件有無喺過程中做啲古惑嘢。因為時間幾趕,所以成 team 人好快已有共識,就係利用一隻 open source 嘅工具,去 capture 軟件嘅網絡流量做分析,同時用不同嘅 軟件(當然都係快靚正嘅 open source,又容易 customise) 監察住隻嘢喺 OS 上嘅行為,例如存取過乜嘢檔案同 registry、執行過邊啲 service,裝咗咩 device driver 咁。

    大家正準備快快手開波,點知呢個時候腦細突然叉隻腳過嚟,話我哋堂堂大公司走去用啲手作仔軟件似乎唔多得體,仲懶有智慧咁叫我哋去買某套工具嚟用。點知一聽之下,竟然係講緊一隻賣緊七位數字嘅工具,搞到大家都 O 晒嘴,心諗鬼唔知阿媽係女人咩,先唔好講無 budget,就算有,淨係做 procurement 都趕唔切 deadline 啦!呢鑊真係想曾鈺成上身,「我建議你少啲講無乜用嘅說話。」當然,大家都係醒目仔,呢句說話梗係留喺心入面先,正所謂笑佢 on cloud 怕佢嬲,今次都係提提佢個 project 唔夠時間,等佢諗嘢唔好咁離地算嘞。

    其實好多時管理層就係諗啲嘢太過 naive,以為買件嘢返嚟就搞得掂;有時買工具之前又只係 on paper 做吓評估,試都唔試過就買,結果返到嚟又唔啱用,又或者啲 settings 好難 tune,好心做壞事。

    最終今次事件點收科?咪就係拋低一句「等遲啲有錢先買」,然後敗走囉。

    相關文章:【Mr. Smith週記】語言偽術之漏洞 vs 後門

    #dynamicanalysis #Opensource #開源

    相關文章