【蛤乸隨街跳】送錢俾你使?實有鬼!

    黑客成日都鍾意勒索屈錢,假扮或者真係鎖咗你部電腦嘅資料,然後叫你交贖金,呢啲我哋已經報導過無數次,唔係乜嘢新鮮事,但原來唔屈你錢,就算話有錢俾你都會出事,正如警訊都有教便宜莫貪,以下呢個就係假送錢但真呃人個案。

    Andy係個兼職設計師,開咗個網站接設計生意,不過一直都未發過市,有一日終於有客搵上門,Dave話想搵人幫手公司設計個logo,唔知Andy幫唔幫到手,咁話晒終於有第一單生意,Andy點會唔接,於是傾好咗用3000蚊做設計費,Andy好快交出初稿,Dave亦讚Andy個設計夠晒正,公司一定收貨。

    但係「問題」嚟喇,所有涉及今次設計嘅素材喺晒顧問K先生度,咁啱呢Dave就爭K先生少少錢,銀碼就唔係多,但係因為某些技術問題,搞來搞去佢都過唔到錢俾K先生,就問Andy可唔可以幫個忙:我俾4500蚊你,你幫我過1400蚊俾K先生,餘下嘅3000蚊就係設計費,仲有100蚊小費可以袋,當係多謝Andy幫呢個忙嘅小小酬勞,咁幫到人又有錢收,Andy當然一口應承,咁就出事喇!

    當Andy收晒錢仲過埋1400蚊俾K先生,幾個星期後,先發現Dave俾佢嘅4500蚊被凍結,原因係呢啲錢係嚟自一張被盜信用卡,而Andy又無得取消嗰1400蚊轉帳,眼白白俾人呃咗!

    以上只係其中一個例子,其實仲有好多人遇過類似招數,最常見係有陌生人,無端端話唔小心過多咗錢俾你,可唔可以做好心過返俾佢,大家都估到個結果係點……其實只要無視呢類請求,然後打俾自己間銀行備案,就唔會咁易出事啦!

    資料來源:https://bit.ly/2E4JCcb

    #Freelance #Kaspersky #Slash #transferscam

    相關文章