【藍牙爆格】爆到爆唔到 唔係靠彩數

    美國加州警方表示,最近汽車爆竊案嘅數字明顯大增,因為匪徒手上擁有一件「殺手級」武器——藍牙掃瞄器,只要喺你車旁邊掃一掃,就知你架車入面收埋咗啲乜嘢貴重電子產品,令匪徒能夠「快、狠、準」達成爆格任務,你話幾咁好用呢!

    根據加州三藩市警方表示,汽車爆竊案件喺 2017 年明顯增加咗 24%,而嚟到 2019 年更係破盡過往紀錄。而加州警方口中所講嘅藍牙掃瞄器,其實只係一隻手機應用軟件,有免費同收費兩種選擇。不過小編摷過 App Store,就算免費版本,其實已經提供到足夠資訊,俾匪徒決定係咪出手。到底有乜嘢資訊會俾隻 app 掃到,首先就係藍牙訊號嘅強度,等匪徒大約估到件嘢到底放喺車廂邊個位置,其次就係通過對比藍牙產品資料庫內嘅「電子指紋」,隻 app 仲可以顯示埋車入面嘅電子產品型號,甚至有埋相你睇。有咗呢張咁齊全嘅 catalogue,匪徒就可以慢慢揀,避免敲爆車窗後只偷到一啲廉價嘅平板電腦、手機、notebook,大大提升每次爆格嘅效率同價值啦。

    由於呢啲藍牙掃瞄 app 可以隨便喺 iOS App Store 或 Google Play 上下載,安裝同使用亦零難度,所以就算唔係身處美國加州,香港嘅匪徒一樣都識得用。咁要點先可以保護到自己嘅電子產品?唔通次次落車都要跟身?答案當然唔係啦,其實只要完整熄咗電子產品嘅藍牙功能,又或開啟飛航模式,都可以制止藍牙發射器持續洩密。另外,專家指出好多人都會忽略手提電腦嘅安全性,以為只要進入待機模式,藍牙都會自動熄埋,但實情係電腦依然會間中發出藍牙訊號,所以如果懶得成日 boot 機,就買一個可以阻擋訊號嘅 notebook 袋,咁就萬無一失啦!

    資料來源:https://bit.ly/2PxKtYb

    相關文章