【遲早出事】數據力量同用法 會嚇你一跳

    最近金價高到得人驚,日日係咁升,好似 2019 年全年金價就升咗19%,跑贏恒指,再次證明黃金依然係避險之王。大家唔好誤會,以為去錯咗財經版,只係近年好多人都話「data is gold」,喺呢個年代,數據價值唔會差得過黃金,但係數據會唔會好似黃金咁樣,有完善嘅機制監管佢嘅買賣同埋升跌呢?睇完以下三篇報導,你或者會有答案。

    第一篇係《華盛頓郵報》上月初嘅報導,內容係講微定向(micro-targeting)呢家嘢,近年被政黨廣泛應用,用佢嚟追蹤特定選民,收集並建立數據庫,再靠數據分析嚟設計競選活動。2016年美國大選時,侵侵俾錢請嘅「劍橋分析」(Cambridge Analytica)就係玩微定向嘅高手,因而俾唔少人質疑微定向改寫咗選舉結果。Google 同埋 Twitter 早前已公布,佢哋唔再俾微定向用喺政治用途,唯獨係 Facebook 企硬唔肯咁做,《華盛頓郵報》仲訪問咗 Facebook 前資訊保安總監 Alex Stamos,佢話微定向唔係追蹤一、兩個美國人,而係成千上萬人,咁樣做其實係扼殺緊真正嘅民主。

    另一篇報導嚟自《Politico》,又係追住 Facebook 而嚟,佢哋嘅記者調查之後發現,有 265 個 Facebook 專頁喺過往嘅一年半時間,洗咗成 400 萬美金去賣關於侵侵嘅廣告,而呢堆 Facebook 專頁全部都冇註冊成為政治團體,而佢哋嘅資金來源更加係無從稽查。《Politico》訪問咗政治行動委員會發言人 Kelly Sadler,佢直言目前係冇方法可以阻止。不過既然 Facebook 俾得呢堆專頁運作,一定掌握咗管理專頁嘅人或者機構嘅資料,但最後佢會唔會交出嚟,真係好難講!

    最後一篇報導嚟自《紐約時報》,今次就唔關 Facebook 事,佢哋測試咗一堆手機 app,發現至少有 75 間手機 app 公司,從美國境內 2 億部手機中接收位置資訊,記錄低手機機主去過邊度,有啲更會清晰記錄用家喺大廈入面嘅活動。當中最變態嘅手機 app,竟然一日間收取機主14000 次位置資訊!而目前係冇任何一條法律,去監管收集位置數據,加州大學電腦保安研究員 Serge Egelman 接受訪問時更加話,就算手機app公司冇好好保護呢類數據,都唔會有乜嘢嚴重後果。

    從以上三篇報導就見到,目前數據運用仲係有欠監管,而呢批數據未變成黃金之前,可能已經影響到你個人私隱,甚至會令民主蕩然無存,大家都意識到科技嘅重要性,但係唔係可以好好利用到,就真係需要諗一下。

    資料來源:https://bit.ly/2QshLtu

    相關文章:【FB用戶福音】全新功能 Off-Facebook Activity 助你私隱自決

    #BigData #CambridgeAnalytica #DonaldTrump #Facebook #google #MicroTargeting #NewYorkTimes #Twitter

    相關文章