【希特拉都驚】殺埋過App Store Fleeceware專恰大懵友
可能大家都唔知乜嘢係 Fleeceware，雖然佢被定位為「反派」，但佢唔會偷你私隱或錢，唔會偷偷哋控制你部手機，亦唔係一裝就中招，但如果你裝咗而個人又好大頭蝦，咁你就有好大機會跌錢㗎喇！
網絡安全服務供應商 SophosLabs 早前發表報告，指有證據顯示 Fleeceware 正開始由 Google Play Store，轉移去 Apple 嘅 App Store 落手。Fleeceware 其實應該歸類入欺詐手機應用軟件，佢嘅呃錢手法係透過唔同途徑吸引用家安裝及訂閱試用服務；當試用期屆滿，就會變成自動每月收錢，一旦用戶「訂閱」咗呢啲 app，而刪除嗰陣又唔記取消埋訂閱，咁就會即刻被「過數」一個月甚至一年費用，想追返都難！好熟哩？其實而家香港都仲有好多服務供應商用緊呢招，舉例申請家居寬頻，通常送你幾個月收費電視試用服務，只要你選擇使用，但實際上連TV box 都無插，只要試用期一過就會自動過數，如果當事人無核對信用卡月結單習慣，隨時交咗成年月費都唔發現㗎！最慘係就算你想 cut 服務，但要成功搵到有關部門都唔易，所以先有「希特拉都cut唔到」呢段萬能key 潮片啫！
SophosLabs 喺上年 9 月已揭發咗一批針對 Android 手機嘅 Fleeceware 惡意軟件，去到今年一月更發現 Google Play Store 上嘅 Fleeceware 下載量激增至 6 億次。最新嘅調查報告更顯示 Fleeceware 已進軍埋 Apple App Store，暫時有 30 幾隻，但已錄得 360 萬以上下載量。高級安全研究員 Jagadeesh Chandraiah 話以前用家可能喺買增強功能時先要俾錢，但而家就變成試用期後自動續約，呢種呃錢方法某程度上又無違規，只係不老實咁解，所以專家就奉勸大家，喺訂閱任何應用服務前，記得要睇清楚條款，了解取消服務嘅困難程度，以及喺刪除軟件前記得要取消咗訂閱先，咁就唔怕變成下一個「希特拉」啦！
相關文章：【有懷疑唔好裝】Google Play嚴打手機app取用權限
