【燈死燈還在？】重裝 Philips Hue 隨時被入侵
又係 IoT 出事，今次仲要係好多人用嘅 Philips Hue Smart Light Bulbs 添，唔知你屋企有無裝到呢？
智能醒家居係唔少人追求嘅理想生活環境，特別係一啲唔使好大安裝工程，就可以應用到嘅產品。其中智能燈膽就有唔少人買，因為可以遙控燈膽開關同變色，雖則裝完之後通常都唔會點轉色，但如有朋友上門就可以威威咁囉。最近網絡安全方案供應商 Check Point 就發表研究報告，指出 Philips Hue 智能燈膽有已知嘅漏洞可被黑客利用，入侵家居網絡並安裝勒索軟件或其他惡意軟件，好危險。 https://www.youtube.com/embed/4CWU0DA__bY?wmode=transparent&rel=0&feature=oembed
Check Point 安全專家示範整個攻擊流程，今次主要係利用低功耗無線傳輸協議 ZigBee 嘅漏洞。首先黑客會利用漏洞控制燈膽嘅顏色或亮度，令用家誤以為手機應用程式無法控制燈膽，於是就嘗試解除並重新進行配對。當重新配對時，手機應用程式會搵到呢個已被加入惡意更新檔嘅燈膽，重新將燈膽連接返入家居無線網絡。之後黑客就利用 ZigBee 漏洞，向專用橋接器發送大量數據，觸發記憶區溢位，繞過限制喺橋接器上安裝惡意程式，成功入侵家居無線網絡。如發現網絡內有一啲電腦嘅作業系統存在如 EternalBlue 等嘅漏洞，黑客就可以入侵及安裝惡意軟件，甚至感染網絡內其他電腦裝置。
Check Point 喺上年 11 月發現呢個漏洞後，已即時通知 Philips 且得到對方確認。而 Philips 方面亦已推出修補更新檔，各位用家快啲檢查一下有無設定自動更新，如軟件版本係 1935144040 之前，就要快啲手動更新喇。
相關文章：【無計啦！】晶片先天缺陷 大條道理換新iPhone
