【wepro小教室】域名搶註

域名搶註（Cybersquatting）係一個互聯網領域嘅現象，指有啲人會搶先一步，去登記含有著名企業商標嘅網域名稱，而呢啲人又叫做「網絡蟑螂」。

每個網站域名都係獨一無二嘅。網路蟑螂通常會註冊大量有潛在價值嘅域名，等有需要嘅公司或個人出價，從而轉售賺錢。有啲網路蟑螂就會將註冊嘅域名，用嚟濫發垃圾郵件、釣魚網站、或者其他非法用途。

好似早排有網絡安全公司發現，同 ChatGPT 相關域名嘅每月註冊量增加咗 910%！雖然啲網站暫時不含惡意內容，但萬一被濫用時，威脅就會隨之而來。

域名搶註行為本身唔犯法，不過好多時都會牽涉到侵權問題。當然，如果係用虛假、欺詐等手段搶域名，或者用域名嚟進行非法活動，例如釣魚網站，咁就犯法喇。