【wepro小教室】勒索軟件

    勒索軟件其實係黑客用嚟控制使用者電腦或加密資料嘅軟件病毒,成功之後就要求受害人畀贖金(多數會以加密貨幣作為贖款),換取重獲資料或者正常營運。一般嚟講,勒索軟件會以網路釣魚攻擊或點擊劫持等方式作為入侵點,如果受害人一旦無為意安裝咗勒索軟件病毒入自己部電腦,使用者就無法存取其電腦資料或使用電腦。而當病毒入侵網路之後,就會喺裝置之間橫向散播。

    加密攻擊係最常見嘅勒索軟件類型,受害人電腦上嘅所有檔案都會被病毒加密,唔畀錢就唔解密,啲檔案就用唔到。另外仲有刪除威脅,換言之如果喺期限前未支付贖金,所有資料就會被刪除。

    要避免勒索軟件攻擊,最好就係唔好胡亂下載不明電郵嘅附件,都唔好下載網絡上嘅不明檔案,使用病毒偵測軟件掃描病毒。最重要係時刻保持警覺,唔好畀黑客有機可乘!