【wepro 小教室】木馬程式

成日都講木馬程式，究竟係咩嚟呢？其實佢係一種用喺入電腦後門嘅程式，黑客首先傳播隱藏木馬程式嘅正常應用程式，令受害人不虞有詐下載，當受害人執行相關應用程式，木馬就會隨之運行，令黑客可以透過遙距控制，偷取受害人電腦入面嘅資料。

透過安裝木馬程式打開後門，一般而言木馬程式包含伺服器端和用戶端，植入受害者電腦嘅係伺服器端，黑客則利用用戶端，進入運行中嘅伺服器端電腦，就可以隨意進入受害者嘅電腦系統，可能造成用戶資料洩漏、破壞，甚至令成個系統崩潰。

要防範木馬程式入侵，最簡單方法就係使用防毒軟件，避免下載來歷不明嘅應用程式或者軟件，同埋部署防火牆等。