【wepro小教室】黑暗網絡

    上次同大家介紹咗Deep Web(深層網絡),今次就介紹埋相信好多人都聽過黑暗網絡(Dark Web,簡稱暗網)。唔少人可能都覺得 Dark Web 黑暗又神秘,其實 Dark Web 係 Deep Web 嘅其中一環,能夠提供用戶匿名及私隱嘅特殊網路空間,用一般瀏覽器係睇唔到,而最具代表性嘅工具就係Tor(The Onion Router,洋蔥網絡)

    Dark Web 本身唔係一件犯法嘅事,但基於佢本身擁有嘅匿名及隱蔽特性,所以好多內容都牽涉到毒品、色情、暴力等非法行為,例如兒童色情網、性虐片段、恐怖主義論壇等。Dark Web 亦成為網上黑市交易場所,常見出售嘅「貨品」有毒品、失竊信用卡資料、槍械、假護照等等,仲可以用加密貨幣交易。當中最出名嘅交易網站叫 Silk Road(絲綢之路),創辦人嘅故事更被拍成紀錄片《silk road: drugs, death and the dark web》。