蠕蟲病毒（Computer Worm）係一組程式碼，附喺應用程式或檔案上，會自動複製干擾電腦運作，損毁遭入侵電腦內嘅檔案，或影響網絡效能同穩定性。 佢傳播嘅主要模式係以電郵或即時訊息傳播，可以自動複製傳送至電郵信箱嘅聯絡人，並模仿中毒電腦受害人係寄件人，發送附有病毒嘅電郵；如果對方開啟該電郵，就會中毒，再傳畀更多人，繼而造成大規模感染，甚至發動分散式阻斷服務攻擊（DDoS）。

點擊劫持（Clickjacking）就係將惡意程式，隱藏喺睇落去正常嘅網頁入面，誘騙瀏覽者點擊相關隱藏內容，目的多數係令受害人下載惡意軟件、導向至惡意網頁、偷取憑證、網上轉帳或購物等，又被稱為界面偽裝攻擊（UI Redress Attack）。 攻擊者多數使用一個透明 iframe（iframe 係 HTML 標準中嘅一個標籤），並將佢覆蓋喺網頁上，然後誘使用戶喺該頁面上操作，用戶不知情下點擊透明 iframe 頁面，就會載入目標網頁，觸發執行惡意網頁嘅命令。簡單嚟講，就係你期待睇 A，但點擊入去之後佢就畀 B 你，掛羊頭賣狗肉，好似想睇戲，但點知畀人帶咗去購物咁。

帳號填充攻擊（Credential Stuffing）係指黑客透過洩漏出嚟嘅憑證資料，嘗試登入受害者其他帳戶，去獲得更多私隱資料或機密。黑客利用大家經常使用同一個帳戶名稱，以及同一組密碼嘅習慣，繼而入侵受害人更多嘅帳戶。 防範帳號填充攻擊最好嘅方法，就係千祈唔好喺所有網站用同一組密碼，特別係電郵帳戶同銀行帳戶，切記要用一個獨立而設嘅密碼。當留意到有網站發生帳戶資料外流事故，就要盡快去更改網站密碼喇！

釣魚電郵有別於一般針對受害者電子裝置嘅攻擊，而係模仿其他公司所發出嘅電郵，誘騙受害人交出個人憑證，再假冒其身分行動，例如盜用信用卡等，有時信件一開始就會向受害人直接要求匯款「打救」。 近年詐騙者嘅手法更見高明，以社交工程攻擊（social engineering attack）嘅方式，了解目標對象嘅生活習慣、朋友圈子等，再度身訂造一封偽裝成來自可信任來源嘅電郵，誘騙受害者上當。 想知道提防釣魚電郵有咩方法？即刻重溫我哋嘅專訪，由專家教路如何自救：https://bit.ly/3uWQVLR

唔知大家有冇留意上網嗰陣成日出現「允許 Cookie」？其實 Cookie 係用嚟令上網瀏覽更便捷嘅機制，可以免去會員網站輸入登入資訊嘅麻煩，下次登錄時直接可以完成登入程序，以 Cookie 作為伺服器驗證憑據；另外，亦可以喺網購時記錄產品資訊。 不過凡事有正必有反，如果對不可信任嘅網站允許 Cookie，就會發生 Cookie 竊取，即係被不法分子利用唔安全嘅連線，竊取用戶嘅 Cookie，隨即喺網站上假扮受害人，藉此更改設定嚟劫持受害人已登入嘅帳戶，再作攻擊。 要避免被黑客竊取 Cookie，記得要定期清理 Cookie 紀錄呀！

網絡攻擊有好多種，你又認識幾多呢？今次小編想同大家講解嘅係 DDoS，全名叫 Distributed Denial-of-service Attack，即係分散式阻斷服務攻擊，攻擊者會透過不斷請求，耗盡目標電腦的網絡、系統或伺服器資源，直至無法負荷服務中斷，繼而令正常用戶無法存取。 DDoS 攻擊多為使用多於一部電腦，向目標發送惡意流量，呢啲電腦通常係殭屍網路嘅一部分，因而可以由單個攻擊者進行遠端控制，或者由多個攻擊者聯合起來，一齊用電腦發送流量作 DDoS 攻擊。 DDoS 主要針對金融業、政府機構、網上零售、遊戲伺服器等，要防禦 DDoS 攻擊，可以使用 Web 應用程式防火牆，提升網絡設備，以篩選 Web 流量及作限制，或採用相關抵擋 DDoS 的網絡服務等。